Чингис Хаан Үндэсний Музей

ХАРАГЧИН ТУУЛАЙ ЖИЛИЙН буюу 2024 оны “ШИЛДЭГИЙН ШИЛДЭГ БАРИЛГА”-аар: “БИЛГҮҮН МОНГОЛ КОНСТРАКШН” ХХК-ийн гүйцэтгэсэн Монголын төрт улсын түүх, өв соёлыг дэлхийд түгээн сурталчилан таниулах “ЧИНГИС ХААН ҮНДЭСНИЙ МУЗЕЙН” барилгыг “Орчин үеийн дэлхийн жишигт нийцсэн, олон улсын стандарт шаардлага хангасан, архитектур, интерьер дизайны төгс шийдэлтэй, музейн шинэ технологи, инновацийг нэвтрүүлсэн барилга байгууламж” үндэслэлээр өргөмжлөв. Чингис Хаан Үндэсний Музей : Чингис хаан Үндэсний музей нь 2019 онд Ерөнхий сайд У.Хүрэлсүхийн шийдвэрээр байгуулагдсан. Тус музейд нүүдэлчдийн анхны төрт улс Хүннүгийн эзэнт улсыг үндэслэгч Модун шаньюйгаас эхлээд ХХ зууны эхэн хүртэлх Монголын төрт улсуудын хаад, язгууртны үйл ажиллагаа, эдэлж хэрэглэж байсан эд өлгийн зүйлс, томоохон бодит үйл явдлыг харуулах 10000 гаруй эх үзмэрийг орчин үеийн дэвшилтэт технологи болох AR, QR, VR, интерактив, видео зэрэг техник технологи, уран зураг, гар зураг, баримал, дархны урлал, оёдол, хатгамал, макетаар дэглэн үзүүлж байна. Чингис хаан музейн 1 болон 6 дугаар давхарт байрлах 76,9м2 талбай бүхий “Хүүхдийн болон Тусгай хэрэгцээт иргэдэд зориулсан боловсролын танхим”-ууд нь тус бүр нэг ээлжиндээ 20-25 хүүхэд хүлээж авах боломжтой ба сүүлийн үеийн сургалтын тоног төхөөрөмж, хүүхдэд зориулсан тавилга эд хогшлоор тусгайлан тохижуулсан. Уг танхим нь сан хөмрөг, үзмэр цуглуулгадаа суурилсан музейн боловсролын хөтөлбөрийг хэрэгжүүлж, сургалт танин мэдэхүйн үйл ажиллагаа тогтмол зохион явуулдаг ба сургалтад хэрэглэгдэх үзүүлэн, хуулбар үзмэр, тараах материалыг ашиглаж бие даан урлан бүтээх, зурж бичих, өөрийн сурахыг хүссэн зүйлээ хайж олж судлах гэх мэт бүтээлчээр суралцах албан бус сургалтын орчин юм.